Cabanlas nadismaya sa pamahayag ni P/Col. Gonda nga uncooperative ang mayor

Mayoriyang gi-aprobahan sa konseho sa syudad atol sa ilang sesyon ni-adtong lunes nga gidumala ni Vice-Mayor Kikang Uy ang resolusyon nga nagpadayag sa pagka dismaya sa giluwatang pamahayag ni P/Col. Lemuel Gonda, Deputy City Police Director sa Cagayan de Oro City Police Office nga uncooperative ang kagamhanang local sa kampanya sa pagsumpo sa covid-19 sa dakbayan.

Kini subay sa gipadangat nga special report ni Konsehal Edgar Cabanlas chairman sa komite sa urban & rural poor and housing Development.

Sumala ni Cabanlas nga naningkamot ang gobernong lokal sa pag-implementar aron pakig batokan ang pandemia sa syudad gani kun adunay gustong ipadangat ang mayor ipa-agi kini sa mga hingtungdang ahensya aron mahiusa ug mahiuyon ang mga lakang sa goberno.

Gipasabot ug gi-klaro ni Cabanlas nga adunay managlahing gahum ug trabaho ang atong kapolisan ug ang atong mga namunu-an sa syudad busa dili angay nga muluyat ug pamahayag si Col.Gonda nga wala siya masayod kun unsa ang gibuhat ug paningkamot sa mga opisyal sa dakbayan aron matubag ang panginahanglan sa katawhan niining panahon sa pandemia.

Niini gipangamahanan ni Cabanlas ang maong resolusyon nga nagpadayag sa pagkasubo ug pagka dismaya ngadto ni P/Col. Lemuel Gonda.