Cabanlas nabalaka sa sunod-sunod nga pagpamusil sa syudad

GIKAHINGAWA ni Konsehal Edgar Cabanlas, chairman sa komite sa Urban and Rural Poor and Housing Development, ang sunod-sunod nga gakahitabao nga pagpangluthang sa syudad diin nakatugaw kini sa kahusay ug kalinaw sa dakbayan.

Kini ang gipadangat nga special report ni Konsehal Cabanlas atol sa sesyon niadtong Lunes nga gidumala ni Bise Mayor Kikang Uy. Sumala ni Cabanlas nga wala siyay gitumbok ug gibasol sa mga pamaagi sa pagsulbad sa maong mga krimen apan angayan

lang nga hatagan kini sa igong pagtagad sa atong kapulisan ug sa ubang pang ahensya sa goberno lokal man o nasyonal.

Dugang pa sa konsehal nga naobserbahan niya ang mga pamaagi sa pagresponde sa kapulisan nga wala kini mahisubay sa ilang police manual diin matud ni Cabanlas nga subay sa rule-22 ang mandato sa unang responder nga pulis didto sa crime scene mao

ang pagluwas sa biktima pinaagi sa pagdala sa pinaka dool nga balay tambalanan, ikaduha nga trabaho sa pulis mao ang pag-evaluate o pag-imbistigar sa crime scene ayha na dayon ang SOCCO.

Nunot niini gusto ni Cabanlas nga dapiton ang kapulisan uban sa mga nagkadaiyang mga ahensya sa goberno aron matutokan kining mga panghitabong krimen sa syudad ug masuta usab kun nasunod ba sa atong kapulisan ang basic police manual.

Niini, ang maong special report ni Konsehal Cabanlas ang giduso kini sa komite of the Whole nga pagadumalahon sa komite sa Public Order and Safety ni Konsehal Romeo Calizo nga magtigom karong December 10 ning tuig.