Cabanlas mitunol og ayuda sa biktima sunog sa Macabalan

MOKABAT sa 18 ka panimalay ug kapin kun kulang 30 ka pamilya ang nawad-an sa ilang pinuy-anan human sa nahitabong sunog diha sa accretion area sa barangay Macabalan niadtong milabayng adlaw.

Niini, si Konsehal Edgar Cabanlas, chairman sa urban & rural poor and housing development, nag-apod apod sa hinabang nga naglangkob sa food packs alang sa mga nasunogan inubanan sa presensya sa konseho sa barangay Macabalan sa panguna niKapitan Norbel Saa.

Ang konsehal mibutyag nga pait kaayo ang nahiaguman sa mga biktima ilabina kay nag-atubang pa kita sa pandemia diin apektado ang panginabuhi sa katawhan ug daghang pa ang nawad-an sa ilang matag adlaw nga kinita-an.

Ako naglaum nga bisan sa ginagmay nga tabang nga inasingkasing nga gitunol ngadto sa mga biktima makatabang nga maalibyohan ang kapit-os nga nasinati dala sa maong kalamidad, pamahayag ni konsehal Edgar Cabanlas.