Cabanlas misugyot malibre paggamit sa mga pansayan sa kamerkadohan

GISUGYOT ni Konsehal Edgar Cabanlas, Chairman sa Komite sa Urban and Rural Poor and Housing Development, nga libre na ang paggamit sa mga publikong pansayan ilabina sa kamerkaduhan sa syudad.

Mao kini ang iyang giluwatan, atol sa sesyon sa Konseho niadtong Lunes nga gidumala ni Bise Mayor Bebot Rodriguez, sa tinguha nga mawagtang ang giingong mga pagduda sa pagpadagan sa maong mga pansayan.

Sumala niya nga angayang hunungon na ang mga lakang nga makamugna og katahap ug kagubot nga naay mga sekreto dinha sa pagpadagan sa mga pansayan. Gani, ang mga malls, airports ug pantalan libre man ang paggamit sa mga pansayan.

Siya midugang nga magahum man sa kagamhanan sa syudad ang pagdestino og mga kawani nga permanenteng magmintinar sa paglimpyo sa mga pansayan sa kamerkaduhan.

“Unta mahatagan kini sa igong pagtagad aron malikayan nga manegosyo ang mga pampublikong pansayan sa syudad,” pamahayag ni Cabanlas.

Ang sugyot ni Cabanlas giduso ni Bise Mayor Bebot Rodriguez ngadto sa Komite sa Economic Enterprises ni Konsehal Yan Lam Lim alang dugang pagtuon ug rekomendasyon.