Cabanlas misugyot mahatagan ug terminal ang Grab, Habal-Habal riders

Dugay nang gitinguha ni konsehal Edgar Cabanlas, chairman sa komite sa urban and rural poor and housing development, nga mahatagan sa igong pagtagad aron matabangan and mga Grab ug Food Panda riders lakip na ang mga habal-habal rider sa syudad nga anaa lang intawon sa bisan asang dapit sa kadalanan mopahulay nga walay insaktong kasilongan panahon sa ulan ug init.

Kini ang obserbasyon ni Cabanlas agig reaksyon sa special report ni konsehal Bernie Esparcia atol sa sesyon niadtong Lunes nga gidumala ni Bise Mayor Jocelyn Bebot Rodriguez mahitungod sa paghatag ug benepisyo alang sa mga Grab rider sa syudad alang sa ilang kapasigurohan.

Matud ni Cabanlas nga dako sila ug natabang sa katawhan ilabi na niadtong panahon sa pandemya busa angayan kining pasalamatan tungod sa ilang pagsilbi sa katawhan sa Dakbayan, gani sa ubang mga nasud dako ang pagrespito niini ngadto sa mga rider, sumpay ni Cabanlas.

Nunot niini gisugyot ni konsehal Cabanlas nga mahatagan sa insaktong kasilongan ang mga Grab ug Habal-Habal Riders pinaagi sa paghimo kanila sa permanenteng Terminal dinhi sa syudad.