Cabanlas misugyot ma-blacklist kontraktor nga gapasagad sa proyekto

Dugay nang namatikdan ni Konsehal Edgar Cabanlas, chairman sa komite sa urban and rural poor and housing development, nga adunay pipila ka mga kontraktor sa mga proyekto sa syudad nga gapasagad sa ilang proyekto, gani ang uban biyaan na lang bisan wala pa kini matibawas.

Kini ang gipaambit nga panahum ni Cabanlas agig reaksyon sa special report nga gipadangat ni Konsehal Malvern “Bernie” Esparcia atol sa sesyon sa konseho niadtong Lunes mahitungod sa usa ka proyekto sa dalan nga napasagdan na ug nahimong peligro sa disgrasya sa mga motorista ug sa katawhan.

Si Cabanlas mibutyag nga gusto niyang madungog ang rekomendasyon sa komite sa public works nga kun makita ug masuta niini nga adunay kontraktor nga dili gatarong og trabaho sa ilang proyekto dili magpanuko pag-blacklist kanila o’ pagdeklara nga persona non grata, sumpay ni Cabanlas.

Niini, malaumon ang konsehal nga mahatagan sa tukmang aksyon ug rekomendasyon sa mga hingtungdan ahensya sa gobyerno ang taho ni Esparcia.