Cabanlas misugyot kagamhanan, DPWH magtambayayong sa implementasyon sa mga proyekto

“MAGTINABANGAY kita ug unsay mahimo sa dakbayan alang sa dugang kalamboan sa mga proyekto sa syudad.”

Kini ang giluwatan ni Konsehal Edgar Cabanlas atol sa miaging tigom sa Komite sa Public Works human gihisgotan ang wala nahuman nga mga proyektong road junction ug drainage diha sa Barangay Lumbia.

Gipasabot sa konsehal nga isip bag-ong chairman sa  komite siya mihangyo  sa rehiyonal nga buhatan  sa Department of Public Works and Highways (DPWH) nga mahisgotan  ang kasamtangan ug  umaabot nga mga proyekto aron han-ay ug hamugaway ang implementasyon.

Gani,  gisugyot sa konsehal nga magtambayayong ang LGU ug DPWH sa pagpatuman sa mga proyekto aron  daling masolusyonan labina ang problema sa  trapiko.

Niini, gidapit ni Cabanlas ang mga hepe o representante sa DPWH pagtambong sa umaabot nga tigom sa komite. Ang maong tigom gitambongan usab ni Konsehal Aga Suan.