Cabanlas misugyot dili dali-dalion pag-blocklist sa project contractors

“KINAHANGLANG matino pag-ayo ug dili angay’ng dali-dalion sa ang pag-blocklist sa mga kontraktor sa proyekto sa giingong wala matibawas nga mga proyekto sa syudad.”

Mao kini ang panahom ni Konsehal Edgar Cabanlas, Chairman sa Komite sa Pamalaod, atol sa sesyon sa Konseho niadtong Lunes nga gidumala ni Bise Mayor Bebot Rodriguez, sa special report ni Konsehal John Michael Seno nga misugyot pag-blocklist sa lima ka kontraktor sa proyekto nga wala makatibawas sa mga proyekto.

Matod niya nga angayang ma-establisar ang basehan dinha sa pagpahamtang sa rekomendasyon pinaagi sa paghimo sa makuting imbestigasyon aron mahatagan sa patas nga kahigayonan sa balaod.

Siya midugang nga kun adunay makitang kasaypanan ang kontraktor dinha sa pagpatuman sa proyekto kinahanglang manubag usab ang kadagkuan sa ahensya sa gobyerno tungod kay anaa kanila ang gahum sa pagsusi sa mga proyekto.

Nunot niini, si Cabanlas miawhag sa dugang pagtuon sa taho ni Seno aron matino pag-ayo ang isyu ug kun masuta nga adunay kalapasan ang mga kontraktor andam ang komite nga morekomendar sa tukmang aksyon.