Cabanlas misanong sa mulo sa mga mag-uuma sa Baikingon

GISUPORTAHAN sa Komite sa Urban and Rural Poor and Housing Development ni Konsehal Edgar Cabanlas ang hangyo sa Patingtingan Forestland and Integrated Farmers Association sa Barangay Baikingon ning syudad nga matabangan mapanag-iya ang lote nga kasamtangan nilang giokupahan sukad pa sa tuig 1940 nga hangtod sa karon wala pa mahatag kanila.

Sa tigom sa komite niadtong Mierkoles, si Alfredo Gala Jr.,Presidente sa maong kapunongan, mibutyag nga ilang gihangyo ang Konseho nga makapasaka og balaod aron sa pag-usab sa klasipikasyon sa lote gikan sa timberland and forestland ngadto sa alienable and disposable.

Mibutyag si Cabanlas nga ang konseho igo lamang mohatag ug resolusyon, tungod kay ang Department of Environment and Natural Resources (DENR) maoy dunay katungod sa pag-aprobar sa maong aplikasyon samtang  ang kongreso maoy adunay gahum sa pagbalhin sa klasipikasyon. Andam ang komite motabang ug mopaluyo sa hangyo sa mga mag-uuma aron matubag ang ilang mulo, dugang pa ni Konsehal Cabanlas.

Niini, giduso sa komite ang hangyo sa maong asosasyon ngadto sa opisina ni 1st District Congresman Lordan Suan aron mahatagan sa igong pagtagad.