Cabanlas mipasusi sa mulo sa taga-Zone 4, Agusan

GIHANGYO ni Konsehal Edgar Cabanlas, chairman sa komite sa urban and rural poor and housing development, ang kadagkoan sa Task Force for the Emancipation of Piso-piso Beneficiaries nga sutaon ang hangyo sa mga molopyo sa Zone 4, Barangay Agusan kabahin sa ilang problema sa road right-of-way.

Kini human nasayran sa konsehal, sa milabayng tigom sa komite, ang problema sa dalan sa dapit ilabina panahon sa dinali-ang panginahanglan o emerhensya.

Gibutyag nga ang loteng gitumbok nga magamit nga dalan gipanag-iyahan sa usa ka pribadong indibidwal u gang mga molopyo sa sulod nga bahin maglisod na sa paggawas tungod kay gisiradoan naman sa nanag-iya ang lote.

Nunot niini, gihangyo ni Cabanlas ang task force nga susihon kun pila ka mga pamilya ang apektado aron mapangita-an sa pamaagi nga mahatagan sa angayang dalan.

Gihangyo usab sa konsehal ang task force pagsumete sa taho sa sunod tigom sa komite.