Cabanlas mipasusi sa kalangan sa relokasyon sa mga naapektohan sa demolisyon sa Lapasan

TRABAHOON nato nga mahatagan kamo sa relokasyon.

Mao kini ang giluwatang pamahayag ni Konsehal Edgar Cabanlas, chairman sa Komite sa Urban and Rural Poor and Housing Development atol sa tigom sa komite niadtong milabayng adlaw, ngadto sa mga apektado sa demolisyon diha sa Upper Kolambog, barangay Lapasan.

Nasayran nga 28 pa ka mga pamilya ang naapektohan sa maong demolisyon ug kasamtangang nanimuyo sa Barangay Hall sa Lapasan.

Sumala ni Cabanlas nga ang mga susama niini nga kahimtang angayan nga mahatagan sa prioridad nga matagad sa gobyerno ilabina ang mga kabus nga makabenepisyo sa programa.

Gani, gusto nga ipasusi sa konsehal nganong nalangan ang pag-atiman sa mga apektadong residente.

Ang komite subling motuki sa maong lakang ug dapiton ang tag-iya sa pribadong lote aron pakisayran ang gisaad nga motunol sa ayudang pinansyal ngadto sa mga apektadong pamilya. (SP/MLRapanot)