Cabanlas mipasusi sa illegal settlers dihas Patag

GIPAABOT tun-an sa City Housing and Urban Development Department (CHUDD) ang hangyo sa mga illegal settlers sa Barangay Patag nga makapahimulos sa relocation program sa dakbayan.

Kini human giduso ni Konsehal Edgar Cabanlas, Chairman sa Komite sa Urban and Rural Poor and Housing Development, ngadto sa CHUDD ang maong hangyo aron paghimo og socio-economic survey.

Sa milabayng tigom sa komite, gipasabot ni Cabanlas nga daghan kaayo ang gustong makapahimulos sa programa sa relokasyon sa gobyerno apan kinahanglan nga mosubay sa nakalatid nga mga lagda ug rekisitos.

“Gani, daghan pa sa katawhan ang angayang hatagan ilabina ang mga natumbok nga mga biktima sa sunog, demolisyon, ug mga walay permanenteng pinuy-anan. Kini sila ana-a pa sa mga temporary shelters sa barangay Pagatpat ug nagpaabot nga makabalhin sa ilang mga permanenteng pinuy-anan,” dugang sa konsehal.

Si Cabanlas malaumon nga masabot kini sa katawhan tungod sa kadaghan sa gustong makapahimulos sa programa apan limitado ang rekorso sa dakbayan.

Niini, iyang gitahasan ang CHUDD sa panguna ni Atty. Samuel Rollo nga mohimo sa makuting pakisusi sa maong hangyo aron mahatagan sa tukmang rekomendasyon ug aksyon.