Cabanlas mipasusi sa hangyosa molopyo sa Zone-5 Ilaya Carmen

GIAKSYONAN ni Konsehal Edgar Cabanlas, chairman sa Komite sa Urban and Rural Poor and Housing Development, ang hangyo sa mga molopyo sa Banaba Street, Ilaya, barangay Carmen nga mahatagan og relokasyon ug ayudang pinansyal.

Kini human nagtigom ang komite ug nasayran nga mokabat sa 20 ka pamilya ang apektado sa gitakdang demolisyon subay sa gipakanaug nga Writ of Demolition sa Branch 24 sa Regional Trial Court, Misamis Oriental.

Si Cabanlas mipasabot nga maninguha ang kagamhanang lokal nga matunol ngadto sa sa nanginahanglang katawhan ang tukmang serbisyo apan wala gayuy gahum ang syudad nga magpahunong sa gimandong demolisyon gikan sa korte.

Niini, giduso ngadto sa buhatan sa City Housing and Urban Development Department (CHUDD) ug City Social Welfare and Development (CSWD) ang hangyo sa mga apektadong molopyo dinha sa Banaba Street.

Ang duha ka buhatan gitahasang makigtambayayong sa mga apektadong pamilya aron mahan-ay ang gihangyong ayuda ug relokasyon.