Cabanlas mipasusi sa gihangyong ROW dihas Zone 6, Bulao, Iponan

Gitahasan ni Konsehal Edgar Cabanlas ang opisina sa Task Force Emancipation of Piso-Piso Beneficiaries ni Engr. Armen Cuenca pagpahigayon og ocular inspection uban sa konseho sa barangay Iponan, mga molopyo sa Zone 6 Bulao ug mga tag-iya sa lote nga maigo sa gisugyot nga dalan nga magamit alang sa mga molopyo.

Sa milabayng tigom sa komite, si Cabanlas mibutyag nga andam ang kagamhanang lokal nga motabang sa mga susamang problema apan kinahanglang masuta pag-ayo ang gidak-on sa himoong dalan ug ma-ila ang mga tag-iya sa lote aron dili lisod ang himoong negosasyon.

Hinuon, gikompirma sa representante sa konseho sa barangay Iponan nga adunay pipila ka tag-iya sa lote ang mihatag na sa ilang panugot tungod kay lakip usab sila nga makabenepisyo sa paga-ablihang dalan.

Niini, gihangyo ni Cabanlas ang naglangkob sa Task Force Emancipation nga mapadali ang pagpahigayon sa survey ug pagsumete gilayaon sa rekomendasyon sa survey aron masugdan ang negosasyon ug mapangitaan sa igong solosyon.