Cabanlas mipasalig magpadayonpagtabang sa homeowners assn

MAGPADAYON ang pagtabang ni Konsehal Edgar Cabanlas, chairman sa komite sa urban and rural poor and housing development, sa pagpatitulo sa lote sa mga benepisaryo sa Socialized Housing Project sa syudad ubos sa administrasyon ni City Mayor Rolando ‘Klarex’ Uy.

Sumala ni Konsehal Cabanlas nga niadtong Marso 24 ug 25 ning tuig gipahigayon ang titling documentations sa mga opisyales sa Homeowners Association (HOA) diha sa Chali Beach Resort and Conference Center diin ang maong aktibidad gimugna aron masuportahan ang mga HOA sa ilang legal nga dokumentasyon sa yuta pinaagi sa inisyatiba sa Department of Justice ug Registry of Deeds.

Siya midugang nga usa kini ka mahinungdanon nga lakang padulong sa maayong urban planning ug legal nga katin-awan sa katungod sa yuta.

Atol sa maong kalihukan gitunol usab ang titulo sa pipila ka molopyo sa Macanhan ug benepisaryo sa Barangay Consolacion ning syudad.

Niini nagpadangat si Cabanlas sa iyang pagpasalamat ni Mayor Klarex Uy sa makanunayong pagsuporta sa maong programa ug sa pag-abag sa Task Force Emancipation pinaagi ni Engr. Armen Cuenca. (MLRapanot/SP)