Cabanlas mipahurar sa bag-ong napili nga BOD sa Regency Plains HOA

Si Konsehal Edgar Cabanlas, Chairman sa Komite sa Urban and Rural Poor and Housing Development, mipahurar sa mga bag-ong napili nga mga miyembro sa Board of Directors sa Regency Plains Homeowner’s Association sa Phase-3 sa Barangay Iponan, ning syudad niadtong milabay’ng adlaw.

Kini sa katuyuan nga mapalig-on ang ilang panaghiusa sa mga molopyo ug daling mapaabot ang ilang hangyo ngadto sa mga opisyal sa barangay ingon man ngadto sa mga namuno-an sa Dakbayan. Sa iyang mensahe, kinasing-kasing nga gipahalipayan ni Konsehal Cabanlas ang mga opisyales ug miembro sa maong kapunongan og nanghinaot sa malahotayon nga panaghiusa ug kooperasyon sa matag pamilya.

Gipahibalo usab sa konsehal nga nagpadayon ang makanunayong pagsuporta sa mga programa ni Mayor Rolando Klarex Uy sa kabarangayan ilabina ang pagtunol sa mga batakang serbisyo nga angayang mapahimuslan sa katawhan sa syudad.

Niini, iyang gidayeg ug gipasalamatan ang konseho sa Barangay Iponan pinaagi ni Kapitan Dondon Allorin sa paninguha niining maangkon ang dugang kaarangan, kalamboan ug panaghiusa sa katawhan sa barangay.