Cabanlas mipabalik sa hulagway ni Elizaga isip usa’s mga mayor sa CDO dihas Exec House

Dako ang katingala sa pamilyang Elizaga sa pagkawala sa hulagway ni kanhi Mayor ug Bise Mayor John Elizaga nga gipahimutang uban sa mga kanhi namunu-an sa syudad dinha sa lobby sa Executive House.

Kini ang unod sa special report ni Konsehal Edgar Cabanlas atol sa sesyon sa konseho niadtong Lunes nga gidumala ni Bise Mayor Jocelyn “Bebot” Rodriguez.

Matod niya nga nakalingkod ug nagsilbi usab isip mayor sa syudad sulod sa duha ka bulan si Elizaga human midagan pagka kongresista si kanhi Mayor Pablo Magtajas sa tuig 1998.

Gikabisgo pag-ayo sa kapikas ni Elizaga ang maong panghitabo nga sa walay pagpahibalo ug unsay hinungdan gitangtang ang hulagway sa usa ka kanhi opisyal nga naghatag og dungog ug kaayuhan sa dakbayan, sumpay ni Cabanlas.

Siya midugang nga gitawag pang Golden Mayor of Charter City si Elizaga sa panahon nga naglingkod kini isip mayor samtang Centennial Mayor usab si kanhi Konsehal Manolo Tagarda.

Niini, malaumon si Cabanlas nga mabalik pagbutang ang hulagway ni Elizaga kinsa tiunay nga nagsilbi ug nagserbisyo usab sa katawhan sa syudad.

Ang maong taho ni Cabanlas giduso ni Bise Mayor Bebot Rodriguez ngadto sa komite sa turismo ni Konsehal Jay Pascual alang sa pagpahigayon og pakisusi. (MLRapanot/photo by JRGalano/SP)