Cabanlas mikwestyon sa kalangan pagtrabaho sa access road dihas Tambo, Macasandig

ONSE na ka tuig ang milabay apan wala pa gihapon nahuman ang proyekto pagtukod og dalan dihas Tambo, Macasandig nga magamit nga access road paingon sa Macasandig-Balulang bridge.

Mao kini ang unod sa special report ni Konsehal Edgar Cabanlas, chairman sa komite sa urban and rural poor and housing development, atol sa sesyon sa konseho niadtong Lunes nga gidumala ni Bise Mayor Bebot Rodriguez.

Matod sa konsehal nga ang proyekto gisugdan niadtong Setyembre 15, 2011 apan hangtod sa kasamtangan wala pa nahuman. Gani, matod niya, ang syudad migahin og P1.10 milyones aron sa pagbayad isip just compensation sa loteng gipanag-iyahan sa Bell Church Foundation, Inc. nga naigo sa proyekto ug sa tuig 2012 midugang og P112 mil alang sa improvements nga napatuman sa lote.

Gikatingala ni Cabanlas nga taliwala sa gibayad sa dakbayan wala gayud masugdi ang pagtrabaho sa proyekto pagpalapad sa maong dalan.

Angayang maimbestigahan kini aron matino ang hinungdan sa kalangan sa proyekto, panawagan ni Cabanlas.

Niini, si Bise Mayor Bebot Rodriguez miduso sa taho ni Cabanlas ngadto sa komite sa public works ni Konsehal John Michael Seno alang sa pagpahigayon og imbestigasyon ug rekomendasyon.