Cabanlas mihangyo sa saktong pagbalita sa mga panghitabo

GIHANGYO ni Konsehal Edgar Cabanlas, chairman sa komite sa urban and rural poor and housing development, ang mga sakop sa prensa nga dili palabian ang mga balita sa mga panghitabo sa syudad nga makahatag og kahadlok ug kabalaka sa katawhan ug maka-apekto sa mga negosyante.

Kini ang pamahayag ni Cabanlas agig reaksyon sa special report ni Konsehal Roger Abaday atol sa sesyon sa konseho niadtong Lunes nga gidumala ni Bise Mayor Bebot Rodriguez.

Matud ni Cabanlas nga trabaho sa mga sakop sa media ang pagpahibalo sa katawhan sa mga panghitabo sa dakbayan apan iyang gihangyo nga dili lang usab palabihan o pasobrahan ang pagpagawas sa maong balita nga makahatag na hinoon sa kahadlok sa katawhan.

Matod niya nga iyang gisabot ang trabaho sa media. Gani, angay kining duyogan sa ilang kausa ug krusada kay ang media man maoy mo-utingkay sa mga hiwing binuhatan sa mga naghupot sa dagkong katungdanan.

Niini, mi-apela ug mihangyo si Cabanlas sa mga sakop sa prensa sa Cagayan de Oro nga ang insakto ug dili lang palabi-an ang pag-balita aron dili usab ma-apektuhan ang ekonomiya sa syudad. (SP/MLRapanot)