Cabanlas miawhag sa mga HOAs pahimuslan mga programa sa LGU

GIAWHAG ni Konsehal Edgar Cabanlas, Chairman sa Komite sa Urban and Rural Poor and Housing Development, ang tanan lehitimong Homeowners’ Associations (HOAs) sa syudad nga pahimuslan ang mga gipatumang programa sa gobyerno.

Gitumbok sa konsehal ang financial assistance nga 20% equity alang niadtong mga kapunungan nga adunay tinguha nga paliton ang lote nga ilang giokupahan. Sumala ni Cabanlas nga nagpadayon ang maong programa ug daghan na ang nakapahimulos ug natabangan nga kapunungan niini.

Sa milabayng tigom sa komite, gipasabot sa konsehal nga sundon ug kumpletohon lang ang mga rekisitos kay kanunay nga magpaluyo ang komite sa pag-endorso ngadto sa opisina sa Mayor aron mapangitaan sa gikinahanglang pundo.

Nasayran nga usa sa nagtinguha nga makapahimulos sa programa mao ang Indahag Ville Homeowners Association, Incorporated. Malaumon si Cabanlas nga nasabtan sa mga homeowners’ association ang programa sa gobyerno ug kinahanglan nga moagi kini sa insaktong proseso.