Cabanlas miaksyon sa mulo sa taga-Brgy 35

Dako ang kabalaka sa 13 ka pamilyang molopyo sa J.R. Borja Extension sa Barangay 35 human ilang nadawat ang pahibalo nga gihatagan lang sila og tulo ka bulan sa tag-iya sa lote nga mopahawa sa dapit. Kini ang hinungdan nga midangop sa kagamhanan sa dakbayan ang maong mga molopyo aron makapahimulos sa Housing Relocation Program.

Sa milabayng tigom sa komite sa urban poor ni Konsehal Edgar Cabanlas, si Kapitan Jose Ligtas sa Barangay 35 mibutyag nga aduna nay initial nga panagsabot ang tag-iya sa lote ug mga molopyo apan wala kini mapadayon human wala magkauyon sa mga hangyo.

Niini, si Cabanlas misugyot nga lingkuran balik sa mga opisyal sa barangay uban sa tag-iya sa lote ug mga molopyo ang maong panghitabo sa panghinaot nga makab-ot ang maayong solosyon.

Gitahasan usab sa komite ang opisina sa City Housing and Urban Development ni Atty. Samuel Rollo nga moabag sa ipahigayong negosasyon aron matabangan ug mapangitaan sa pamaagi ang mga apektadong pamilya.