Cabanlas miaksyon sa mulo sa molopyo sa Zone-10 Cugman

Aron matabangan ang mga residente sa Zone 10 Cugman Urban Poor Livelihood Association nga apektado sa ipatumang 6-lane construction project sa Department of Public Works and Highways (DPWH), giduso ni Konsehal Edgar Cabanlas, chairman sa komite sa urban and rural poor and housing development, balik sa konseho sa barangay Cugman ang ilang hangyo aron masuta ug maila ang tinuoray nga mga apektadong pamilya.

Sa milabayng tigom sa komite, gipasabot ni Cabanlas nga kinahanglan makigkoordinar ang kapunungan ngadto sa barangay aron malingkuran ug masabotan uban sa mga kawani sa DPWH ang problema.

Nagtuo si Cabanlas nga adunay mga gabayan nga gisunod alang niadtong apektadong pamilya ang opisina sa DPWH ayha kini nila pagabayaran. Mahinumduman nga nagpatabang sa komite si Marjunel Cabaluna, presidente sa kapunungan, nga mabayaran ang ilang panimalay nga maigo sa maong proyekto.

Niini, gihanyo ni Cabanlas ang konseho sa barangay Cugman nga dapiton ang mga opisyal sa DPWH ug mga opisyal sa kapunungan aron mapangitaan kini sa tukmang solosyon.