Cabanlas miaksyon sa hangyosa Indahag Ville H’owners Assn

SI Konsehal Edgar Cabanlas, Chairman sa Komite sa Urban and Rural Poor and Housing Development, mihatag sa daling aksyon sa hangyo sa mga molopyo sa Indahag Ville Homeowners Association.

Ang kapunungan mihangyo nga makapahimulos sa 20% equity nga tabang sa kagamhanang lokal aron magamit nga pasiunang bayad sa tag-iya sa loteng ilang kasamtangan giokupahan sulod sa dugay na nga panahon.

Gitinguha sa mga residente nga maangkon nila ang maong lote human mitugot ang tag-iya nga iyang ibaligya kini ngadto sa mga okupante.

Sa milabayng tigom sa komite, gipasabot ni Cabanlas nga iyang gipangamahanan ang ordinansa nga mapahimuslan sa mga lehitimong asosasyon ang on-site relocation program sa syudad pinaagi sa pagsunod sa mga gikinahanglang rekisitos.

Si Cabanlas miduso sa hangyo sa kapunungan ngadto kang Mayor Klarex Uy ug sa opisina sa City Housing and Urban Development Department (CHUDD) aron mapangitaan sa gikinahanglang gahin.