Cabanlas miaksyon sa hangyo sa AMFANA

ARON masolosyonan ug matabangan ang mga molopyo sa Amihang Mindanao Farmers and Neighborhood Association (AMFANA) sa Macanhan, barangay Carmen, si Konsehal Edgar Cabanlas, chairman sa komite sa Urban and Rural Poor and Housing Development, naninguha nga ma-convert ang klasipikasyon sa yutang ilang giukopahan.

Sa milabayng tigom sa komite, ang konsehal misugyot sa pagpasaka og resolosyon nga maghanyo nila ni Kongresman Lordan Suan sa unang distrito sa dakbayan ug Kongresman Rufus Rodriguez sa ikaduhang distrito nga mopalabang ug balaodnon nga mag-convert sa lote gikan sa timberland ngadto sa alienable and disposable aron ma apod-apod ug mahatag ngadto sa mga aktwal nga molopyo.

Mahinumduman nga ang kapunungan nag-okupar sa Lot-3187 sulod sa kapin sa 30 ka tuig nga naila nga timberland ug adunay portion nga giingong alienable and disposable sukad pa sa tuig 1990 apan napanag-iyahan sa usa ka Casimiro Tamparong.

Niini, malaumon si Cabanlas nga pinaagi sa hugot nga suporta sa duha ka representante sa kongreso mahatagan sa solosyon ang hangyo sa kapunongan.