Cabanlas miaghat sa kabatan-onan pahimuslan ang Scholarship program

Nanawagan si Konsehal Edgar Cabanlas, chairman sa komite sa urban and rural poor and housing development, sa kabatan-onan sa dakbayan ilabina kadtong mga kabus nga malantip ang salabutan apan dili makagahom matungha sa kolehiyo nga pahimuslan ang scholarship program sa syudad.

Sumala ni Cabanlas nga nagdawat na sa mga rekisitos ang City Hall alang niadtong naka-apply na online.

Kini naglakip sa kopya sa grado (Grade-12 1st sem., kopya sa birth certificate, certificate of indigency (binulang kinitaan sa mga ginikanan, certificate of residency, residence map, hulagway sa pinuy-anan ug comelec registration.

Dugtong niini, si Cabanlas mibutyag nga aron hapsay ang pagdawat sa mga rekisitos adunay schedule sa pagsumite sugod niadtong Marso 13, 2023 ug ang gitaksa sa Marso 27 ngadto sa 31 kadtong mga aplikante nga ang apelyido nagsugod sa letrang O ngadto sa Z.

Malaumon si Cabanlas nga mas daghan pang kabatan-onan ang makapahimulos sa programa kay tipik kini sa gihingusgan sa syudad nga matunol nga serbisyo ngadto sa katawhan nga nanginahanlan.