Cabanlas malaumon maareglo mga kasong gisang-at sa Blue Ribbon

- Miawhag sa mga opisyal sa brgy magsinabtanay

MALAUMON si Konsehal Edgar Cabanlas, chairman sa komite sa ethics and blue ribbon, nga maareglo sa mga sinumbong nga opisyal sa barangay ug mga nanumbong ang kasong gisang-at dinha sa komite.

Kini ang panawagan sa konsehal sa milabayng tigom sa komite nga gitambongan nila ni Konsehal Joey Abbu, Roger Abaday, Aga Suan ug Yvy Emano human gidungog ang mga kasong gipasaka batok sa kapitan sa Puntod, Brgy No. 36 ug 32, Bugo ug Kauswagan.

Matod ni Cabanlas nga kun mahimo maareglo sa mga kapitan ang maong mga reklamo tungod kay mahimo ra nga mapasabot sa mga nanumbong ang gireklamong binuhatan. Siya mipasabot nga dili tiaw ang gasto nga dala sa pagpasaka og kaso gawas pa sa kahasol nga masinati sa matag partido kun ang sumbong mahimo gayud nga maareglo.

Aron malikayan nga moabot pa sa komite ang mga reklamo, unta hatagan sa pagtagad sa mga opisyal sa barangay ang reklamo sa katawhan ug sa ilang mga kaubang opisyal sa barangay, panapos ni Konsehal Edgar Cabanlas.