Cabanlas gustong pa-imbistigahan ang giingong mga proyekto nga wala matibawas

GIKLARO ni Konsehal Edgar Cabanlas, chairman sa Komite sa Urban and Rural Poor and Housing Development nga ang migawas nga obserbasyon gikan sa Rehiyonal nga buhatan sa Commission on Audit (COA) nga unliquidated disbursement sa tuig 2018-2022 nga P211milyon, dili pa sa panahon ni Mayor Rolando Klarex Uy.

Kini ang unod sa special report ni Cabanlas atol sa sesyon niadtong Lunes nga gidumala ni Bise Mayor Bebot Rodriguez. Matud sa konsehal nga dili pasabot nga sad-an na ang nalambigit niini apan gusto lang niini nga matubag ug matin-awan ang katawhan sa maong isyu kay katungod nga mangita ug obligasyon nila ang pagbantay sa sape sa katawhan.

Gikahingawa ni Cabanlas ang taho sa COA nga adunay 37 ka mga proyekto sa syudad ang wala pa matibawas apan nabayaran na kini sa goberno human makuha ang 15% mobilization fund.

Niini, gihingusgan ni Cabanlas nga masuta ug ma-imbistigahan kini nga isyu kay katungod sa katawhan nga masayod.

Ang maong taho ni Cabanlas giduso sa Komite sa Public Works ni Konsehal John Michael Seno ug sa Komite sa Panalapi ni Konsehal Yan Lam Lim alang sa dugang imbistigasyon ug rekomendasyon.