Cabanlas gustong masugdan profiling sa apektado sa demolisyon sa Pagatpat

Gihangyo ni Konsehal Edgar Cabanlas, chairman sa komite sa urban and rural poor and housing development, ang mga kawani sa City Housing and Urban Development Department (CHUDD) nga mohimo og makuting pakisusi aron matabangan nga mapahilona ang mga apektado sa demolisyon diha sa Fatima subdivision barangay Pagatpat.

Kini subay sa hangyo ni Kapitan Roel Gabo human giingon nga daghan ang dili angayan nga mahimong benepisaryo sa housing program sa syudad gikan sa mga maapektohan sa demolisyon.

Sa milabayng tigom sa komite, si Gabo miingon nga angayang masuta ug maimbistigar pag-ayo sa buhatan sa CHUDD tungod kay adunay gitawag nila diha sa dapit nga Kurtina Gang nga dili angayan mahatagan sa housing program sa gobyerno gawas nga dili kini kwalipikado tungod kay dugay nang wala nagpuyo sa maong dapit.

Lakip sa gihangyo sa kapitan nga magamit sa mga pamilyang apektado sa demolisyon ang bakanteng lote nga iya sa syudad isip temporaryong kapuy-an samtang gihikay pa ang rekisitos alang sa ilang relokasyon.

Niini, si Cabanalas miawhag sa konseho sa Pagatpat nga mosumite sa resolosyon alang sa maong katuyuan samtang gitahasan usab ang opisina sa CHUDD nga mapadali ang paglihok sa gikinahanlang rekisitos aron matabangan ug mapahilona ang mga biktima.