Cabanlas gitudlong representante sa P4 Selection Committee

Paborableng gipaluyohan sa tibouk konseho sa syudad ubos ni Bise Mayor Bebot Rodriguez ang katudloan ni Konsehal Edgar Cabanlas isip representante ngadto sa P4 Selection Committee (P4 SC).

Kini human gisagop sa konseho sa sesyon kagahapon ang resolosyon nga nagtudlo sa konsehal isip opisyal nga representante sa konseho subay sa Section 14 sa Ordinance No. 13457-2018 kon City of Cagayan de Oro P4 Code nga naghan-ay sa Public-Private Partnership for the People’s initiative (P4) approach alang sa pagkab-ot sa dugang kalamboan ug kaarangan sa lokal nga kagamhanan.

Ubos sa ordinansa, ang Selection Committee langkoban sa third ranking officer sa syudad, city legal officer, city treasurer, city planning and development officer, usa ka representante gikan sa konseho sa syudad ug duha ka representante gikan sa akredited nga CSO, PO ug NGO kinsa sakop sa City Development Council/Regional Economic and Development Board.

Ang katudloan ni Cabanlas girekomendar ni Mayor Klarex Uy ug gipaluyohan sa komite sa pamalaod ni Konsehal Ian Mark Nacaya.