Cabanlas gitinguha mapadayon ang pagtunol sa mga titulo sa lote

LAING hugna sa pagpang apud-apod sa titulo sa lote sa mga residente sa Upper Macasandig ang ipahigayon sa syudad.

Kini human giduso ug gihan-ay  atol sa tigom sa Komite sa Urban and Rural Poor and Housing Development ni Konsehal Edgar Cabanlas ang Implementing Rules and Regulation ( IRR ) sa Ordinansa nga magtunol sa titulo ngadto mga benepisaryo kalabot sa lote nga kasamtangan nilang giokupahan sulod sa dugay na nga panahon.

Sumala ni Konsehal Cabanlas nga maoy damgo ug tinguha sa goberno lokal nga mapadayon ang housing program sa syudad  aron sa paghatag og desenteng kapuy-an sa mga kabus sa dakbayan nga kasagara niini dili makagahom tungod sa kawad-on.

Nasayran nga mokabat sa 119 ka pamilya diha sa Barangay Macasandig  ang hayan  makapahimulos sa maong programa.

Dili matukib ang kalipay nga gibati sa mga molupyo ug sila nagpadangat sa ilang pasalamat ngadto ni Mayor Rolando Klarex Uy ug sa Komite sa Urban Poor ni Konsehal Cabanlas tungod sa maong kalamposan nga ilang naangkon.

Niini malaumon si Konsehal Cabanlas nga daghan pang mga kabos sa syudad ang matabangan sa maong programa ilabina niadtong walay pinuy-anan ingon man ang mga biktima sa sunog ug demolisyon.