Cabanlas gipamatud-an walay bulok sa politika programa sa CCSP

GIKLARO ni konsehal Edgar Cabanlas, chairman sa Komite sa Urban & Rural Poor and Housing Development, nga wala sukad mahitabo nga nasagolan sa politika ang programa sa City College Scholarship Program (CCSP) sa gobyerno lokal kay adunay gabayan nga gisunod sa pagpili sa mga makapahimulos sa programa.

Kini ang reaksyon ni Cabanlas sa gipadangat nga special eport ni Konsehal Lordan Suan atol sa sesyon niadtong Lunes nga gidumala Bise Mayor Kikang Uy mahitungod sa giingong tangtangon sa Scholarship program sa syudad kun dili mobotar sa linya sa administrasyon.

Sumala ni Cabanlas nga kun giluwatan man kini nga pamahayag sa usa ka kapitan sa barangay dili pasabot nga adunay kasayuran ang mayor, bise mayor ug mga sakop sa konseho kay wala man kini sugo-a.

Sama sa Special Program for Employment of Students (SPES) ug pag-apod apod sa mga titulo sa lote sa mga benepisaryo sa Piso-Piso Program walay bulok sa politika ang tanan nga natabangan ug nakapahimulos sa programa, sumpay ni Cabanlas.

Niini, siya andam mobarug ug mopasabot nga sa kasamtangang administrasyon wala sukad nadungog ug nahitabo nga gisagolan sa politikanhong kalihukan ang mga programa nga alang sa katawhan.