Cabanlas gihangyo mabayaran mga pamilyang naapektohan sa proyekto

SI Konsehal Edgar Cabanlas, chairman sa komite sa urban & rural poor and housing development, naninguha nga mabayran sa insakto ang mga pamilyang naapektohan sa gipatumang proyekto diha sa District 4 Balacanas Riverside sa Barangay Puntod.

Sa milabayng tigom sa komite, girekomendar ang pagpasaka og resolosyon nga maghangyo sa Toyo Construction nga doblehon lang ang gibayad sa mga apektadong pamilya tungod sa kalisod sa panahon karon gumikan sa pandemya.

Matud ni Cabanlas nga sa P20 mil nga tabang himuon unta kini nga P40 mil. Dili kini dako nga kantidad tungod kay upat man lang ka pamilya ang apektado sa maong proyekto.

Dako ang panghinaut ni Cabanlas nga masabot ug mouyon ang kontraktor sa hangyo tungod ug alang sa kahupayan sa tanan.