Brgy 3 migahin og P387 mil alang sa 20% DF

Mokabat sa P378,954.00 nga pundo sa Barangay No. 3 ang gigahin alang sa 20% Development Fund (DF) aron gamiton sa paglimpyo sa ilang mga kanal.

Kini human ang konseho sa syudad sa sesyon kagahapon nga gidumala ni Bise Mayor Jocelyn Rodgriguez misagop sa resolusyon nga nag-uli sa ordinansa sa Barangay 3 diin nasukip ang ilang 2022 Annual Budget nga mobalor og P3,208,772.00 alang sa hingpit nga implementasyon.

Lakip sa gipundohan sa barangay nga mapatuman mao ang proyekto nga magpatuman sa programa sa edukasyon lakip na sa nutrisyon ug panglawas, pundo alang sa mga PWD’s ug mga hamtong ug pagpalit og mga kagamitan agig pangandam sa kalamidad.

Migahin usab ang barangay og 10% alang sa pagpatuman sa mga programa pagpalambo sa kabatan-onan sa ilang dapit ug uban pang mga programa ug proyekto nga gilantawng magpalapad sa ilang serbisyo sa barangay.

Ang resolosyon nga gipasaka sa konseho alang sa maong katuyuan gipaluyohan sa komite sa barangay affairs ni Konsehal Alam Lim ug komite sa pamalaod ni Konsehal Ian Mark Nacaya.