BPATC TODA mihangyo mahatagan og permit

KONSIDERAHON sa Komite sa Public Utilities sa konseho ubos ni Konsehal Romeo Calizo ang  resolusyon nga gipasaka sa Bugo-Puerto, Agusan, Tablon-CugmanTricab Operators and Drivers Associaiton (BPATC TODA), kapunungan sa  mga drivers ug operators sa tricabs  units kon bao-bao.

Sa maong resolusyon, gihangyo sa kapunongan ang lokal nga kagamhanan sa dakbayan nga mahatagan silag permit o’ prankesa nga maka-operate gikan sa Barangay Bugo, Puerto, Tablon, Agusan ug Cugman ning syudad aron ilang maserbisyohan ang mga pasahero labina panahon sa kagabhion nga wala nay magdagan nga mga public utility jeepneys.

Sumala sa kapunongan nga mao kini ang nagsilbing panginabuhian kanilang nahisakop sa indigent sector sa komunidad nga buot lamang mabuhi para sa ilangpamilya.

Ila usab gipasabot kon mahatagan sila sa kahigayonan nga ma-regulate sa kagamhanan, hayan malikayan ang pagdagan sa mga dili rehistrado nga mga units ug mga badlongong drivers sa bao-bao drivers labina kadtong walay mga lisensya ug dili residente sa dakbayan.