BP2 program sa GUFA mapatuman na

HINIUSANG giuyonan sa Konseho sa Syudad ubos ni Bise Mayor Bebot Rodriguez ang ordinansa nga naghatag og katungod ni Mayor Klarex Uy pagpirma sa Memorandum of Agreement (MOA) tali sa kagamhanan sa dakbayan ug Department of Agriculture-Regional Field Office 10 (DA-RFO 10) alang sa hingpit nga pagpatuman sa Balik Probinsya, Bagong Pag-asa (BP2) program alang sa Guinitan Upland Farmers Association (GUFA).

Kini ang programa subay sa  giluwatang Order Ehikutibo No. 114, s. 2020 nga nag-awhag  sa mga molopyo nga mobalik sa tagsa-tagsa ka gigikanang probinsya aron patas nga maapod-apod ang bahandi, rekorso ug kahigayonan alang sa pagkab-ot sa kalamboan sa kabaryohan.

Si Konsehal Jay Pascual, Chairman sa Komite sa Agriculture and Cultural Communities, hugot nga mirekomendar sa pagpalabang og ordinansa human iyang nasuta nga ang maong programa dako  og ikatabang sa  mga benepisyaryo nga mapalambo ang ilang kinabuhi.

Ang ordinansa nga gipalabang sa konseho alang  sa maong katuyoan gipaluyohan usab sa Komite sa Pamalaod ni Konsehal Edgar Cabanlas.