BP2 program mapatuman sa CDO

HINIUSANG giuyunan sa Konseho sa Syudad ubos ni Bise Mayor Bebot Rodriguez ang ordinansa nga naghatag og katungod ni Mayor Klarex Uy pagpirma sa Memorandum of Agreement (MOA) tali sa kagamhanan sa dakbayan ug Department of Social Welfare and Development (DSWD-10) alang sa hingpit nga pagpatuman sa Balik Probinsya, Bagong Pag-asa (BP2) program.

Kini human ang Komite sa Social Services ni Konsehal Girlie Balaba mirekomendar sa pagpalabang sa ordinansa human nasuta nga ang programa gilaumang makatabang sa mga molopyo sa dakbayan nga mapalambo ang ilang kinabuhi.

Si Balaba mibutyag nga ang programa nunot sa giluwatang Executive Order No. 114, series of 2020 nga gitumong sa pag-agni sa mga molopyo nga mobalik sa tagsa-tagsa ka mga gigikanang probinsya aron patas nga ma-apod-apod ang bahandi, rekorso ug kahigayonan alang sa pagkab-ot sa kalamboan sa kabaryohan.

Ang gipalabang nga ordinansa alang sa maong katuyuan gipaluyohan usab sa Komite sa Pamalaod ni Konsehal Edgar Cabanlas. (JNortiza/SP)