Blue Ribbon motuki sa reklamo batok kapitan, kagawad

GIPAABOT nga tukion sa komite sa ethics and blue ribbon ni Konsehal Edgar Cabanlas ang reklamo batok sa kapitan ug kagawad sa Barangay 7.

Kini human usa ka kagawad sa barangay ang mireklamo kalabot sa giingong iregularidad sa gihimong pagpalit og mga butang niadtong Marso 2020 nga mobalor og P20 mil nga matod pa gamiton alang sa pagpakgang ug pagkontrolar sa Covid-19 sama sa disinfectant, alcohol, face mask, gloves, kape ug sabon.

Sa maong sumbong gibutyag nga ang supplier wala gayud makadeliver sa maong mga butang apan nagdawat lamang sa royalty fee balor 10% sa gigamit nga official receipt.

Dugang pa, giingon nga ang rehiyonal nga buhatan sa Commission on Audit mirekomendar sa pagpasaka sa angayang legal action batok sa mga opisyal nga nakalapas sa balaod human nasuta sa gipahigayong pagsusi nga adunay mga irregularidad sa nahisgotang transaksyon. (SP/JNortiza)