Blue Ribbon mihusay sa reklamo batok kapitan sa brgy Kauswagan

Dako ang panghinaut ni Konsehal Edgar Cabanlas, chairman sa komite sa ethics and blue ribbon, nga maareglo na ang panagbingkil tali sa kapitan sa barangay Kauswagan ug sa usa sa mga molopyo niini.

Kini human gidungog, atol sa milabayng tigom sa komite, ang reklamo nga gipasaka sa mag-asawang Ramon Ua-o batok ni kapitan Pedro Balite kalabot sa giingong pagbabag nga maaprobahan ang aplikasyon sa fencing permit dinha sa buhatan sa Building Official (OBO).

Niini, si Cabanlas nag-awhag sa kapitan nga tabangan ang mga mireklamo nga makuha ang gikinahanglang permit ug kun makab-ot ang panag-uyon ipahibalo ang komite.

Sa iyang bahin, si Konsehal Jose Pepe Abbu, Jr., misugyot usab nga sa ipahigayong panagsabot dapiton ang representante sa OBO aron mohatag sa katin-awan sa pagahimuong lakang sa duha ka partido. Ang tigom sa komite gitambongan usab nila ni Konsehal Roger Abaday, Aga Suan ug Yvy Emano.