Biz permit renewal gilugwayan ngadto’s Peb 28, 2023

Gilugwayan sa konseho sa syudad ubos ni Bise Mayor Bebot Rodriguez ang panahon sa pagrenew sa mga aplikasyon alang sa business permits ug licenses.

Kini human gipalabang sa konseho sa sesyon niadtong Lunes ang ordinansa nga naglugway sa panahon gikan sa Enero 20, 2023 ngadto sa Pebrero 28, 2023.

Ang maong lakang nunot sa rekomendasyon ni Mayor Klarex Uy sa tinguha nga mahatagan ang mga negosyante og dugang panahon paglukat sa ilang mga lisensya ilabina nga bag-ohay lang nanumbalik ang pagsaka sa ekonomiya gikan sa nasinating pandemya dala sa Covid 19.

Ang deadline sa pag-renew sa business permit subay sa probisyon sa Local Government Code gitakda sa Enero 20 matag tuig apan ang lokal nga kagamhanan gihatagan sa kahigayonan nga lugwayan ang maong panahon basi sa kahimtang sa ekonomiya ug sa mga kapasidad sa mga magpapatigayon.

Niini, si Bise Mayor Bebot malaumon nga ang maong lakang makaabag sa mga negosyante dinha sa ilang mga aplikasyon alang sa renewal sa permits and licenses sa ilang mga patigayon nga walay pagabayaran nga penalties ug surcharges. (JNortiza/SP)