Bernie nangusog masulbad problema sa panubig sa Victors Subdivision

Angayan nga hatagan og pagtagad ang problema sa katawhan nga nanimuyo sa pipila ka pribadong subdibisyon, ning syudad.

Kini ang unod sa special report ni Konsehal Bernie Esparcia, atol sa sesyon sa konseho niadtong Lunes nga gidumala ni Bise Mayor Jocelyn Rodriguez, kalabot sa problema sa panubig sa Victors Subdivision dinha sa barangay Carmen. Matod sa konsehal nga mipadangat kaniya ang mga molopyo sa subdivision kalabot sa kalubog sa tubig nga mag-agas sa ilang mga gripo.

Gani, matod niya, nga adunay ubang subdivision nga sa pagsumete sa ilang proposal ug ilabina sa ilang mga pahibalo puerte gayud ka nindot kay kompleto sa mga fasilidad apan aduna diay mga kakulangon ilabina gayud kining limpyo nga supply sa tubig.

Gidugang sa konsehal nga adunay mga subdivision nga mosaad og igong supply sa tubig apan dili mo-konektar sa Water District ug ang isaad deep well apan sa dihang daghan na ang makapuyo ang resulta dili na diay kaya sa ilang tinubdan sa panubig.

Niini, si Esparcia nakisayod sa mga ahensyang mahimong makaaksyon sa mulo ilabina nga gabayad og sakto sa ilang mga units ang mga residente apan sa aktwal daghan og mga kakulangon.

Dako akong panghinaot nga mahatagan kini og igong pagtagad ug makorehian ang dili maayong sistema alang sa kaayohan sa mga molopyo, panapos ni Esparcia.