Bernie miawhag mabutang warning signs sa gitrabahong kadalanan

Unta mabutangan og ngipon ang mga ordinansa nga napasar sa konseho sa dakbayan.

Kini ang panawagan ni Konsehal Bernie Esparcia atol sa sesyon sa Konseho niadtong Lunes nga gidumala ni Bise Mayor Bebot Rodriguez.

Matod sa konsehal nga daghan kaayong gipangtrabaho nga proyekto sa kadalanan nga wala makita nga road warning signs nga nakahatag og pelegro sa katawhan ug mga motorist.

Gipasabot ni Esparcia nga nahilatid sa balaod ang pagbutang og road signs sama sa poster o’ blinking lights diha mismo duol sa proyekto nga dayag nga makita sa katawhan aron malikayan ang disgrasya.

Gani, iyang gikalipay ang mga kalamboan nga natagamtaman sa syudad tungod kay usa kini ka highly urbanized city apan kinahanglang lantawon ug unahon ang kaluwasan sa katawhan.

Panahon na nga hatagan og ngipon ang ordinansa ug unta matutokan usab sa City Engineers Office (CEO) ang pagsusi sa mga proyekto ug pagseguro nga natuman sa mga kontraktor ang probisyon sa pipila ka balaod alang sa maong katuyuan. (Text and photo by JRGalano/SP)