Basura, nagdapog nga balas hinungdan sa baha - Abaday

NAGTOO si Konsehal Roger Abaday, Chairman sa Komite sa Environment nga ang nagtipun-og nga mga basura ug balas diha sa canal ug drainage sa kabarangayan  ang hinungdan nga moapaw ang tubig ug moresulta dayon sa pagbaha sa syudad.

Kini ang gibutyag ni Konsehal Abaday basi sa impormasyon nga gihatag kaniya ni Engr. Joel Momongan, Department Manager sa City Engineer’s Office.

Sumala sa konsehal nga adunay gibubo nga  mga dagkong proyekto ang Department of Public Works and Highways sa lokal nga kagamhanan sa syudad, sama sa drainage system nga makatabang og dako panahon sa ting-ulan apan tungod kay gagmay ang gawasanan sa tubig, nagpundo na hinuon ang mga basura ug balas ug kini ang usa sa nakitang problema nga makasinate gihapon ang syudad og mga pagbaha.

Nanawagan si Abaday sa mga  opisyales sa kabarangayan nga mopahigayon og de-clogging activities sa ilang mga barangay aron maminusan o malikayan ang pagsaka sa tubig panahon sa ting-ulan.

Nunot niini malaumon si  Konsehal Abaday nga adunay insaktong kooperasyon ug koordinasyon ang mga opisyal sa kabarangayan, kadagkoan sa City Engineering Office ug ang DPWH-10 aron tukion ang mga posibleng aksyon ug solusyon sa maong problema sa pagbaha sa syudad.