Barangay angayan usab magpakabana sa basura, Konsehal Abaday

SI Konsehal Roger Abaday chairman sa komite sa senior citizen, nanawagan sa kabarangayan sa syudad nga lakip usab kini nga magpakabana sa paghinlo sa ilang palibot sa barangay pina-agi sa pagkolekta sa mga basura pinasikad sa R.A 9003.

Kini ang unod sa special report ni Konsehal Abaday atol sa sesyon niadtong Lunes nga gidumala ni Bise Mayor Kikang Uy.

Sumala ni Abaday nga gikahingawa niya ang pagkadugay sa pagkolekta sa basura sa syudad ni-adtong holiday season nga mi-resulta daghang mulo sa katawhan.

Gihangyo sa konsehal ang mga barangay opisyal sa dakbayan nga dili magsalig kanunay sa syudad nga maoy mokuha sa ilang mga basura ug angayan usab motabang sila kay kaayuhan man kini sa tanan.

Niini nanghinaot ug nagpahinumdom si Konsehal Abaday nga niining gi-atubang nga pandemia kinahanlan kaayo sa tanan ang kooperasyon,pagtinabanga ug pagsabot aron magpabilin kitang luwas ug malikay sa bisan unsang matang sa sakit.