Bao-bao gidid-an pag-agi sa nat’l highway - Calizo mihangyo sa pagsabot sa mga maapektohan

HUGOT nga gihangyo ni Konsehal Romeo Calizo nga masabtan sa mga nanag-iya sa bao-bao ang balaod nga nagdili kanila pag-agi sa national highway.

Mao kini ang panawagan sa konsehal human mipasaka sa ilang hangyo ang Batulong Foundation nga unta makaagi ang ilang delivery vehicle nga bao-bao diha sa national highway panahon nga mag-deliver kini sa ilang hinabang ngadto sa mga nasakupang kapunungan.

Nasayran gikan sa representante sa foundation, atol sa milabayng tigom sa komite ni Calizo, nga aduna silay usa ka unit nga bao-bao nga gigamit paghatod og food packs ngadto sa ilang mga gisuportahang iskolar diha sa Cugman, sentro Tablon ug Palalan, Tablon.

Niini, si Calizo nagpasalamat sa foundation sa ilang pag-abag sa mga nanginahanglan apan iyang gihangyo nga masabtan ang balaod nga nagdili sa mga bao-bao pag-agi sa national highway.

“Dili mahimong supakon sa lokal nga kagamhanan ang balaod nga ang tinguha mao ang kaayuhan sa tanan,” pasabot ni Calizo.

Hinuon, ang konsehal namahayag nga mahimong makatabok sa highway ang mga bao-bao apan gidili gayud ang pagbyahe niini agi sa national highway.