Balor P18.8M nga 2022 annual budget sa Bayabas aprobado na

MAPATUMAN na sa Barangay Bayabas ang ilang mga programa ug proyekto nga gipundohan karong tuiga.

Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2022 Annual Budget nga adunay gibanabanang kinitaan ug galastohon balor P18,829,954.00.

Gipunduhan sa barangay mao ang mga proyekto ug programa nga maghatag og kalamboan ug kaarangan sa ilang serbisyo sa katawhan.

Ang maong lakang miagi sa makuting pagtuon ug deliberasyon sa mga hintugdang komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gisagop sa konseho alang sa maong katuyuan gipaluyuhan sa komite sa barangay affairs ni Konsehal Yan Lam S. Lim ug komite sa pamalaod ni Konsehal Ian Mark Nacaya. (SP/JRGalano)