Balor P1.5M kapin nga programa sa SK sa Bayabas mapatuman

Dugang kalamboan sa kinabuhi sa kabatan-onan sa barangay Bayabas ang gilantaw sa dili madugay.

Kini human ang konseho sa syudad sa sesyon kagahapon nga gidumala ni Presiding Officer-Protempore Konsehal Edgar Cabanlas misagop sa Resolosyon nga nag-uli sa resolosyon sa Sangguniang Kabataan sa barangay diin nasukip ang ilang 2023 Annual Budget nga adunay gibanabanang kinitaan ug galastohan balor P1.5 milyones kapin.

Tipik sa gihatagan og prayoridad nga mapatuman karong tuiga mao ang pagrehabilitar sa ilang multi-purpose covered court ug pagpalit og usa ka unit airconditioner.

Gipaabot nga mapatuman usab ang programa sa edukasyon ilabina dinha sa pagpakatap og dugang impormasyon kabahin sa panglawas, active citizenship, pagproteher sa kinaiyahan, gender sensitivity ug uban pang mga programa nga gitumbok pag-aghat sa kabatan-onan nga makiglambigit sa mga kalihokan sa dapit.

Si Konsehal John Michael Seno, chairman sa komite sa sports and youth development ug usa sa nagpaluyo sa gisagop nga resolosyon mipadayag sa iyang suporta sa maong lakang human nakita nga nahisubay kini sa balaod ug dako ang ikatabang alang sa kalamboan sa mga kabatan-onan.

Ang resolosyon nga gipalabang sa konseho alang sa maong katuyoan gipaluhohan usab sa komite sa pamalaod ni Konsehal Ian Mark Nacaya.