Balik Probinsya, Bagong Pag-asa program mapatuman sa CDO

PABORABLENG giduso ni Konsehal Girlie Balaba, Chairman sa Komite sa Social Services, ngadto sa Komite sa Pamalaod ni Konsehal Edgar Cabanlas ang sugyot ordinansa alang sa pagpatuman dinhi sa dakbayan sa Cagayan de Oro sa Balik Probinsya, Bagong Pag-asa Program (BP2).

Kini human ang buhatan sa City Legal mirekomendar nga nahiuyon sa balaod ang gisugyot nga Memorandum of Agreement (MoA) tali sa kagamhanan sa dakbayan ug Department of Social Welfare and Development (DSWD).

Ang programa nunot sa giluwatang Executive Order No. 114, series of 2020 nga gitumong sa pag-agni sa mga molopyo nga mobalik sa tagsa-tagsa ka mga gigikanang probinsya aron patas nga maapod-apod ang bahandi, rekorso ug kahigayonan alang sa pagkab-ot sa kalamboan sa kabaryohan.

Ang Komite ni Cabanlas gipaabot nga motuki sa maong sugyot MOA aron masukip sa mga butang nga hisgutan sa Konseho sa Syudad sa umaabot nga sesyon.