Balik Probinsya, Bagong Pag-asa program mapatuman sa CDO

GILANTAW nga mapatuman sa dili madugay dinhi sa dakbayan sa Cagayan de Oro ang Balik Probinsya, Bagong Pag-asa Program (BP2).

Kini human ang buhatan sa City Legal mirekomendar nga nahiuyon sa balaod ang gisugyot nga Memorandum of Agreement (MoA) tali sa kagamhanan sa dakbayan ug Department of Social Welfare and Development (DSWD).

Mahinumduman nga ang Komite sa Social Services ni Konsehal Girlie Balaba miduso sa sugyot ngadto sa buhatan sa City Legal sa tinguha nga makuha ang legalidad sa maong pakigtambayayong tali sa dakbayan ug DSWD.

Ang programa nunot sa giluwatang Executive Order No. 114, series of 2020 nga gitumong sa pag-agni sa mga molopyo nga mobalik sa tagsa-tagsa ka mga gigikanang probinsya aron patas nga maapod-apod ang bahandi, rekorso ug kahigayonan alang sa pagkab-ot sa kalamboan sa kabaryohan.