Balaod maghatag kapasegurohan sa mga mananap padayong tun-an

PADAYONG tun-an sa Komite sa Climate Change Adaptation and Mitigation and Disaster Risk Reduction ni Konsehal Bernie Esparcia ang giduso nga sugyot ordinansa ni Bise Mayor Bebot Rodriguez nga maghatag og kapasegoruhan sa mga mananap, binuhi ug uban pang matang sa hayop panahon sa kalamidad.

Sa milabayng tigom sa komite, ang bise mayor mipasabot nga gikinahanglan gyud nga malakip ang mga binuhing hayop sa pagpangandam sa katalagman ug mamugna ang holding area alang kanila diha sa mga evacuation sites.

Giaghat usab ni Rodriguez ang City Disaster Risk Reduction and Management Division (CDRRMD) nga pandayon ang angayang mekanismo aron mahanas dinha sa pagluwas sa tanang matang sa mga binuhing hayop.

Sa susamang higayon ang buhatan sa City Local Environment and Natural Resources Office (CLENRO) misumete sa sugyot ordinansa nga naglatid sa Cagayan de Oro Wildlife Resource Conservation diin nasukip pagpahimutang og evacuation area dinha sa Barangay Pagalungan alang sa mga mananap panahon sa katalagman.

Niini, ang sugyot ordinansa giduso sa komite ni Esparcia ngadto sa buhatan sa City Legal alang sa rekomendasyon.