Balaba supak pagpataw og omento sa bayronon sa tubig

DAKONG supak si Konsehal Girlie Balaba sa gilaraw sa Cagayan de Oro Water District (COWD) nga

omento sa bayronon sa tubig.

Mao kini ang hugot nga gibarugan sa konsehal, sa sesyon sa konseho niadtong Martes nga gidumala ni Bise Mayor Bebot Rodriguez, human si COWD General Manager Engr. Antonio Young mipahibalo sa maong laraw.

“Not now nor in the next five years,” pamahayag ni Balaba.

Dako iyang panghinaut nga unta mapakita sa kadagkoan sa Water District ang dayag nga programa dinha sa pagsulbad sa problema sa kakulangon sa panubig.

“Ang akong kanunay makita mao ang mga molopyo sa syudad nga galinya dala og balde kay magsag-ob og tubig. Klaro kaayo nga adunay mga dapit sa dakbayan ilabina sa District 2 nga wala gayud tubig nga gaagas sa ilaha,” dugang sa konsehal.

Matod niya nga unta dili himuong negosyo ang serbisyo sa panubig tungod kay usa kini sa mga batakang panginahanglan sa katawhan.

“Ngano man nga ang katawhan ang magbaguod sa ipatuman nga kalamboan? Dili unta nato ipahamtang ang dako nga omento kun wala man lang makita nga naay supply sa tubig sa tibouk dakbayan,” panapos ni Konsehal Girlie Balaba.